Fákeppni í boði hins opinbera

Í gær fór ég með bílinn í skoðun hjá Aðalskoðun í Skeifunni sem kostaði 6.900 krónur. Ég hringdi í eina keppinautinn sem er Frumherji.  Svarið var líka 6.900 krónur.

Ég spurði hvort þetta væri samkvæmt gjaldskrá frá hinu opinbera.  "Nei", það er frjáls álagning.  Merkileg tilviljun hvað verðin eru svipuð þarna eða hvað?

Þessi fákeppni er alveg  óþörf.  Það er ekki erfið og sérhæfð vinna að skoða bíla.  Þegar ég bjó í Bandaríkjunum kostaði bílaskoðun 900 krónur og hún var  framkvæmd á flestum stærri bifreiðaverkstæðum.

Skoðunin á bílnum mínum tók að hámarki kortér en það gerir 27.600 krónur á tímann.  Ég hringdi í Bifreiðar og Landbúnaðarvélar og spurði hvað útseldur klukkutími á verkstæðinu kostaði.  Svarið var 10.550 kr.  Það er ekki ódýrt en samt bara 38% af verði Aðalskoðunar og Frumherja.

Ég get ekki snúið mér annað og ég get ekki hugsað mér að missa bílinn. Þessi fyrirtæki geta því sett upp hvaða gjaldskrá sem þeim sýnist.

Ég spyr: 

• Hvað finnst ykkur að bifreiðaskoðun ætti að kosta?
• Treystið þið venjulegu bílaverkstæði til að  annast hana? 
• Finnst ykkur núverandi ástand viðundandi?

 

Athugasemdir

[Brjánn Guðjónsson, 5.3.2008 kl. 12:21]

fái maður grænan miða skilst mér að fara megi á verkstæði, láta laga og fái fullnaðarskoðun þar. ég sé ekki hví verkstæðin geti ekki séð alfarið um bifreiðaskoðun, að uppfylltum skilyrðum. þeir yrðu þá að koma sér upp búnaði til skoðunarinnar.

ekki veit ég hvaða kröfur eru gerðar til skoðunarmanna Frumherja og Aðalskoðunar. hafa þeir einhverja lágmarksmenntun?

þegar ég fór með bílinn í skoðun í vetur, gerði maðurinn athugasemd um að legan vinstra megin að framan væri ónýt. ég hvaði og sagði: "það var skrýtið. það er vika síðan skipt var um hana." sem er rétt. legan var ný. hann svaraði þá: "allavega hringlar í þessu." ég velti fyrir mér hvort maðurinn hafi vitað um hvað hann var að tala, eða bara ekki nennt að greina 'hringlið' betur, því ekki var það legan. það fullyrði ég.

[Andri Valur (IP-tala skráð) 5.3.2008 kl. 14:13]

Það er ein skoðunarstöð í viðbót hérna á Höfuðborgarsvæðinu. Heitir Athugun og er niðri í Klettagörðum. "Heimasíðan"

Þegar ég fór með bílinn minn í skoðun í haust  gerði smá athugun. Þá kostaði 6.450 krónur hjá Frumherja en 6.390 hjá Aðalskoðun. Ég skrifaði ekki verðið hjá mér hjá Athugun, man ekki hvort það hafi verið af því ég fékk það ekki eða af því það var ekki ódýrara en hjá hinum. 

Svo má minna á 20% afslætti sem menn fá t.d. með því að vera meðlimir í FÍB eða í Einkalúbbnum.  Bara þetta dekkar góðan hluta af árgjaldinu. 

Með grænu miðana minnir mig að maður geti komið aftur innan viku án þess að þurfa að borga aftur. Það er einhver svoleiðis regla.

En ég er fyllilega sammála þér að þetta er glórulaust verð.  

P.s. þegar ég fór með bílinn í haust fékk ég athugasemd út á rúðuþurrkurnar, að þær væru orðnar slakar! Ég hefði kannski verið búinn að kaupa mér nýjar ef ég hefði ekki þurft að punga út svona miklu fyrir skoðunina.

[Kári Harðarson, 5.3.2008 kl. 14:22]

Takk fyrir þetta.  "Athugun" kemur ekki þegar maður leitar að "Bifreiðaskoðun" í gulu síðunum hjá http://www.ja.is

Minni á þessa frétt frá Mbl í Maí á síðasta ári :

Samkeppniseftirlitið hefur ógilt samruna Frumherja og Aðalskoðunar og segist telja, að samruni félaganna hindri virka samkeppni á markaði fyrir skoðun skráningarskyldra ökutækja og markaðnum fyrir skoðun á aðstöðu, hreinlæti og innra eftirliti vinnsluleyfishafa í sjávarútvegi.

Frumherji keypti í janúar allt hlutafé Aðalskoðunar og segir Samkeppniseftirlitið, að í því felist samruni félaganna tveggja í skilningi samkeppnislaga. Félögin séu hin einu sem starfi á fyrrgreindum mörkuðum og því sameiginlega í einokunarstöðu þar. mörkuðum. Það er mat Samkeppniseftirlitsins að samruni félaganna hindri virka samkeppni á þessum mörkuðum og vinni þannig gegn markmiði samkeppnislaga.

Þeir ætluðu að sameinast.  Segir allt sem segja þarf...

[Úrsúla Jünemann, 5.3.2008 kl. 14:52]

Svona skoðun ætti alls ekki að kosta meira en svona 7000 - 8000 kr. Og það ætti að vera óhætt að framkvæma hana á verkstæði þegar það er vottað að þar séu útlærðir fagmenn að verki.

[Sigurður Jónsson (IP-tala skráð) 5.3.2008 kl. 15:29]

Ef einhver samkeppni væri í þessu, þá giska ég á að verðið væri á bilinu 2.999 til 3.999. Sá sem væri með hæsta verðið myndi réttlæta það á einhvern hátt, t.d. hærra þjónustustigi.

Þetta er einfalt rútínu ferli, sem tekur í mesta lagi korter og þarf ekki merkilegan búnað. Flest öll bifreiðaverkstæði hafa búnað og mannskap til að klára svona skoðanir skv. reglum þar um.

Hér er einfalt að þurrka fákeppnina út með einföldum reglubreytingum, því nægt framboð er af verkstæðum sem væru tilbúin að taka skoðanir að sér - það væri líka þægilegast fyrir bifreiðaeigendur að klára skoðunina um leið og bíllinn fer í viðgerð eða eftirlitsskoðun hjá verkstæði.

Núverandi fyrirkomulag er heimskulegt en samt í línu við margt annað sem íslensk stjórnvöld bera ábyrgð á. Ef þetta væri í lagi er ljóst að mun færri óskoðaðir bílar væru í umferð og því umferðaöryggið í betri málum.

Spurningin er; hagsmuni hverra er verið að verja með þessu fyrirkomulagi?

[Jóhann Ólafsson (IP-tala skráð) 5.3.2008 kl. 21:20]

Hér í Noregi er þessi aðalskoðun (EU kontroll) annaðhvert ár og kostar í kringum 445 NOK (5000 ISK) fyrir venjulega fólksbíla.  Hér eru það helstu bifreiðaverkstæði, NAF (Norsk Auto Forbund) og Vegagerðin sem sjá um skoðunina.  Ég get ekki séð að þetta ætti að vera eitthvað öðruvísi á Íslandi. 

[Ingólfur (IP-tala skráð) 6.3.2008 kl. 07:11]

Í Nýja Sjálandi kostar skoðunin 2000 kr. hámark, en það þarf að fara í skoðun tvisvar á ári. Það eru einnig flest bílaverkstæði sem getað skoðað bílinn.

[Kári Harðarson, 6.3.2008 kl. 08:16]

Sammála þér, Jóhann.

Ég held að þarna hafi einkavæðing farið yfir strikið.  Norska kerfið ætti að geta gengið hér.  

[Einar Þór Strand, 6.3.2008 kl. 09:29]

2000 kr hámark með VSK.  En það er ekki gott að bifreiðaverkstæði framkvæmi hana vegna þess að þá er hægt að finna eitt og annað sem "þarf" að gera til að menn fái skoðun.

[gudni.is, 7.3.2008 kl. 01:35]

Að mínu mati væri ekkert óeðlilegt við það að þessi skoðun kostaði u.þ.b. 4000-5000 krónur hérlendis?  Ég þekki bílageirann mjög vel og er t.d. talsvert inni í mismunandi verðlagningu á útseldum verkstæðistímum hérlendis.

6900 krónur finnst mér vera orðið alltof hátt verð á bifreiðaskoðun.

[Guðni Þór Björgvinsson, 10.3.2008 kl. 18:55]

Þetta er fulldýrt já en þetta er alls ekki sem ætti að vera í höndum einhverja fúskara á hinu og þessu verkstæði útí bæ. Þá er ég hræddur um að það myndi aukast að menn séu að skrifa uppá skoðun fyrir félaganna. Mig hryllir til þess að vita af einhverju liði útí umferðinni á illa búnum og kannski hálfbremsulausum bílum.

Kveðja Guðni-sem-fylgist-vel-með-bílnum-sínum.

[Sigurjón Hákonarson (IP-tala skráð) 15.3.2008 kl. 20:06]

Sæll Kári,

Mitt mat er 3000-4000 fyrir þessa skoðun.

kv. Sigurjón