Kveðið úr gaskútnum

Nú er vor í lofti og nærri tómur gaskútur úti á svölum. Ég setti á mig  neytendahattinn.

Fyrst hringdi ég í Olís sem býður 11 kg áfyllingu af própangasi fyrir 4.026 kr.

Næst hringdi ég í N1 (áður Esso eða Olíufélagið) á Ægissíðu, þeir vildu fá 3.895  kr.

Skeljungur í Skógarhlíð vildi 3.599 kr.

Allar þrjár stöðvarnar voru sammála um að þeir gætu ekki gefið mér inneign fyrir  gasi sem er í kútnum ef ég skila honum ekki tómum. "Við erum ekki með aðstöðu  til þess" var svarið. Með aðstöðu eiga þeir væntanlega við eina vigt.

Öll þrjú félögin kaupa gasið frá fyrirtækinu "Gasfélagið" og fá alla sína  própankúta þaðan.  Félögin áttu gasfélagið saman, en voru neydd til að selja það  eftir ólöglega verðsamráðið.  Einhverra hluta vegna versla þau samt öll við það  ennþá...

ÍSAGA veitir þessu þríeyki samkeppni og selur 10 kg. af gasi á 2.750 kr. Þeir  eru því langódýrastir.  Kútarnir þeirra fást í Byko, ekki á bensínstöðvum.

Þeir taka járnkút frá N1/Skeljungi/Olís uppí fyrir 2.000 kr. en selja manni sína  trefjaglerskúta fyrir 7.150 svo það eru upphafsútgjöld uppá 5.150 fyrir að færa  viðskipti sín til þeirra.

Síminn hjá þeim er 577 3000.

Smá samanburður í lokin (Ég fann tölurnar fyrir útlönd með smá Google leit).

Hvar    Kílóverð í kr.
Olís             366
N1              354
Skeljungur  327
ÍSAGA         275
-------------------
Danmörk     190
Bretland      172
USA            127

PS:  Ég rakst líka á gamalt verð frá Olís og sé að gasið þeirra hefur hækkað um  22% á einu ári.

 

Athugasemdir

[Báran, 11.5.2007 kl. 17:20]

Tók eftir því að þú nefnir ekki Atlantsolíu í verðkönnun þinni? Án þess að ég viti verðið hjá þeim, tók bara eftir þessu.   Selja þeir ekki gas?

[Kári Harðarson, 11.5.2007 kl. 19:31]

Nei - Atlantsolía selur ekki própangas ennþá, mér vitanlega.

[Sigurjón Hákonarson (IP-tala skráð) 12.5.2007 kl. 00:46]

Ertu að spá í að flytja til Danmerkur aftur? Þeir eru með ansi ódýrt gas, það er samt spurning hvorir gasa meira þeir eða við? Vona samt að engir verði settir í klefana út af þessu

[Sigurjón, 12.5.2007 kl. 14:27]

Ég í Byko!  Þakka þér fyrir þessar upplýsingar Kári.

[Ingi Björn Sigurðsson, 13.5.2007 kl. 16:49]

Ísaga er líka með heimsendingarþjónustu... Hefur reynst okkur mjög vel sem eigendum gaseldavélar...

[Kári Harðarson, 13.5.2007 kl. 22:17]

Sæll Sigurjón, ég sé á sendingartímanum hjá þér að það hefur verið gaman.  Nei, það þarf meira en ódýrt gas til að ég flytji aftur til Danmerkur.

Gasið hér er bara helmingi dýrara en í öðrum löndum, það er hlutfallslega billegt.  Ég byrja ekki að pirra mig almennilega fyrr en verðið er fjórfalt eða fimmfalt á við önnur lönd

[Þóra Guðmundsdóttir, 14.5.2007 kl. 00:00]

Þetta líkar mér, svona eiga menn að vera.  Ég er algjörlega sannfærð um það að ef almenningur temdi sér svona vinnubrögð, þó ekki væri nema af og til, myndi vöruverð lækka stórlega.