Gott fólk

Við fórum í sunnudagsmat til tengdaforeldra minna í Hafnarfirði.

Eftir matinn vildi sonur minn finna tónlistarspilarann sinn, sagðist hafa gleymt honum í bílnum. Hann kom inn aftur og sagði að spilarinn hefði ekki verið þar.

Við leituðum í bílnum og í kringum bílinn en ekkert fannst.

Eftir matinn keyrðum við aftur til Reykjavíkur, við vorum að vona að þetta væri misminni, að spilarinn hefði gleymst heima en hann var ekki þar heldur.

Við lögðum heilann í bleyti. Konan mín rifjaði upp að hún hefði heyrt eitthvað detta þegar hún náði í kápuna sína í aftursætið.

Niðurstaðan var að sonurinn hefði lagt spilarann ofan á kápuna, spilarinn hafi svo fleygst út úr bílnum þegar kápan var tekin.

Þetta var mikil sorg, nýr iPod nano kostar margar íslenskar krónur..

Ég ákvað að fara aftur út að leita ef betra vasaljós gerði gæfumuninn og hann lægji milli aftursætanna.

Það fyrsta sem ég sá var iPod spilarinn, undir framrúðuþurrkunni!

Einhver miskunnsamur Samverji í Hafnarfirði hafði séð spilarann í götunni og sett hann undir rúðuþurrkuna. Þannig keyrðum við með spilarann frá Hafnarfirði yfir í vesturbæ Reykjavíkur án þess að taka eftir honum (rúðuþurrkurnar sjást ekki þegar þær eru ekki í notkun).

Ég þakka viðkomandi kærlega fyrir góðan greiða og fyrir að endurnýja trú mína á samfélaginu sem við búum í.

Svo er ég feginn að það rigndi ekki á leiðinni í bæinn!

Athugasemdir

[Rafn Haraldur Sigurðsson (IP-tala skráð) 13.10.2009 kl. 14:47]

skemmtileg saga hjá þér og með góðum endi.

kveðja Rafn.

[, 13.10.2009 kl. 19:00]

Sem betur fer held ég nú að þorri Íslendinga sé gott fólk.

[Halldór Berg Harðarson (IP-tala skráð) 13.10.2009 kl. 21:48]

Awesome:-)

[Ragna Birgisdóttir (IP-tala skráð) 14.10.2009 kl. 11:08]